Orion Minerals het die mark meegedeel dat sy finansiering van 40 miljoen dollar van Glencore nou onvoorwaardelik is. Die geld is die eerste paaiement van ’n groter pakket en sal vanaf einde Oktober vir onttrekking beskikbaar wees. Die maatskappy is op die JSE en die Australiese beurs genoteer en ontwikkel die Prieska-kopermyn in die Noord-Kaap.
Die ooreenkoms met Glencore beloop 250 miljoen dollar en word in drie paaiemente van 40, 50 en 160 miljoen dollar verdeel. Die eerste 40 miljoen dollar finansier konstruksie en produksie uit die boonste deel van die erts-liggaam teen einde volgende jaar. Konsentraat sal vanaf 1 Januarie 2028 aan die mark gelewer word.
Die paaiemente van 50 en 160 miljoen dollar is vir die dieper deel van die myn bestem. Daardie bedryf sal met 2,4 miljoen ton per jaar veel groter wees as die boonste deel se sowat ’n kwartmiljoen ton per jaar. Orion moet oor die volgende 42 maande vasgestelde mylpale haal om die res te ontsluit.
Prieska het vir 35 jaar stilgestaan en ’n deel van die werke het intussen met water gevul. Orion is besig met ontwatering wat net minder as twee jaar sal duur. Die erts op diepte is volgens die maatskappy onontginde materiaal.
Glencore sal 100 persent van die massakonsentraat van die boonste deel neem en ook 100 persent van die dieper deel indien dit ontwikkel word. Uitvoerende hoof Tony Lennox sê die verhouding is markverwant en nie eensydig nie. Hy beskou langtermynverhoudings as ’n stewige grondslag vir hulpbronprojekte.
Tembo Capital uit Londen het as langtermynbelegger onttrek nadat een van sy fondse verstryk het. ’n Suid-Afrikaanse instelling en ’n vermoënde individu het ’n groot deel van daardie aandele oorgeneem. Lennox sê Orion sal nou Suid-Afrika se volgende beduidende koperprodusent wees.