Die Hoogste Hof van Appèl het Vrydag in die guns van Discovery Health beslis en die Padongelukfonds met onmiddellike effek verbied om vergoeding te kort omdat mediese skemas reeds behandeling betaal het. Die hof het daarmee n afwysende uitspraak van Desember 2024 deur n volbank van die Hooggeregshof in Pretoria omgekeer.
Die hof het verklaar dat die fonds en voormalige hoof Collins Letsoalo n bevel van 27 Oktober 2022 oortree het. Regter Mbongwe het in daardie bevel n riglyn van 12 Augustus 2022 onwettig verklaar wat personeel beveel het om geen betalings te maak waar n skema reeds betaal het nie.
Die hof het die fonds en Letsoalo ook verbied om uitvoering te gee aan riglyne van 13 April 2023 en 2 November 2023. Discovery het aangevoer dat daardie riglyne die oortreding voortsit deur eise vir vorige mediese uitgawes steeds af te keur. Die fonds moet binne 14 dae aan die uitspraak voldoen en skriftelik verslag doen.
Koste is teen die fonds en Letsoalo toegeken. Regter Tati Makgoka het die uitspraak gelewer met instemming van vier ander regters. Die hof het bevind dat terugbetaling aan n skema wanneer n eis afhandel nie dieselfde is as die verdeling van opbrengs nie.
Discovery het vroeër gesê skemas ly n onverhaalbare verlies van sowat R500 miljoen per jaar wanneer die fonds nie betaal nie. Sonder vergoeding sou skemas premies moes verhoog terwyl lede steeds tot die brandstofheffing bydra maar nie volle vergoeding ontvang nie.