Die wêreld se grootste maatskappye bestee ’n kleiner deel van hul inkomste aan advertensies, al stu die wêreldmark na ’n rekord van 1,34 biljoen dollar. Navorsing deur WARC toon dat advertensiebesteding by 25 groot Amerikaanse genoteerde maatskappye van 6,1% in 2019 tot 5,5% in 2025 gedaal het. Hul advertensiebesteding het met 56% gestyg, maar inkomste het met 73% gegroei.
Alphabet, Meta, Microsoft en Netflix het hul verhouding van 13% tot 7,4% tussen 2019 en 2025 verlaag. Hul inkomste het met 146% gestyg, van 379 miljard dollar tot 931 miljard dollar. WARC bereken dat die vier groepe verlede jaar 52 miljard dollar meer sou bestee het as hulle hul vlak van 2019 behou het.
Vir Suid-Afrika is die implikasie ernstig. Die tegnologiegroepe besit self die platforms en kliënteverhoudings waarmee hulle gehore bereik. Plaaslike maatskappye moet op daardie selfde platforms ruimte koop om om kliënte mee te ding.
Syfers van die Interactive Advertising Bureau South Africa en PwC toon dat internetadvertensies in 2023 tot R17,7 miljard gestyg het, ’n toename van 21,5%. Digitale advertensies het 39,8% van die totale mark uitgemaak, op van 36,1% in 2022. Die syfers wys nie hoeveel daarvan by Suid-Afrikaanse media bly nie.
Die Mededingingskommissie het in November 2025 gewaarsku dat die verskuiwing tradisionele advertensie inkomste ondermyn het. Dit het tot kleiner nuuskamers en minder verslaggewing gelei. Google, Meta, Microsoft en TikTok dien as poorte vir nuus en verdien geld wat vroeër uitgewers en uitsaaiers ondersteun het.
Kleinhandelaars tree nou as nuwe mediaspelers toe. Shoprite verkoop deur Rainmaker Media advertensies aan verskaffers en gebruik sy Xtra Savings program en Sixty60 platform. Die groep het R593 miljoen uit bemarking en insigte in die 26 weke tot 28 Desember 2025 gerapporteer en is op koers vir meer as R1 miljard per jaar.