Vir Daniël Cillie van Laastedrift Agri berus sukses met BigBucks Gala op basiese beginsels. Die regte plantmateriaal, versigtige boombeheer en veral genoeg ligindringing deur die blaardak bepaal die uitslag. Die plaas Uitkoms hou tans die Buks Nel-wisseltrofee wat Ceres Fruit Growers toeken vir uitsonderlike prestasie met BigBucks Gala.
Laastedrift Agri het in 2015 in samewerking met baanbreker Buks Nel ’n kommersiële proefaanplanting gevestig. Goeie vroeë resultate het die Cillie-gesin oortuig om van 2020 af sterk uit te brei. Die onderneming bestuur vandag 35 hektaar BigBucks Gala as kernpilaar van sy Galaprogram.
Die boord lê tussen 900 en 1 200 meter bo seespieël en ontvang sowat 1 500 koue-eenhede. Die koeler ligging as baie omliggende Ceres-gebiede bevoordeel kleurontwikkeling. Dit is deurslaggewend om te voldoen aan die streng gehaltestandaarde vir Flash Gala, die premiummark waaronder gekwalifiseerde BigBucks Gala bemark word.
Die plaas jaag nie maksimum volume na nie, maar mik na ’n gebalanseerde oes van 80 tot 90 ton per hektaar. Gehalte bly die prioriteit, met ’n Flash Gala-uitpak van minstens 85% tot 90%. In gunstige seisoene word daardie syfers soms oortref.
Hoë uitpakpersentasies begin by snoei en doelgerigte blaardakbestuur vir maksimum ligblootstelling. Oormatige drag kan opbrengs tydelik verhoog, maar ontlok gereeld beurtjare en benadeel vruggehalte. Die span kombineer snoei, chemiese en handuitdunning en groeibeheer om ligverspreiding te verbeter, die plukvenster te verleng en egalige rypheid te bevorder.
Die gestruktureerde bestuur het die afgelope drie seisoene ’n merkwaardig doeltreffende oes moontlik gemaak met alles in een pluk geoes. Cillie waarsku egter dat produsente kostedoeltreffendheid teen die risiko van afgradering by die pakhuis moet opweeg. Vestiging berus op M7- en MM109-onderstamme, gekies volgens grondtipe en groeiplek.