Sun International het ’n nuwe handves vir verantwoordelike dobbel bekend gestel te midde van sterk groei in aanlyn dobbel in Suid-Afrika. Die kommer groei dat mense onder finansiële druk dobbel in die hoop om hul inkomste aan te vul. Die groep, wat die aanlyn platform Sunbet bedryf, sê regulering het nie tred gehou met die vinnige verandering in die bedryf nie en wil met selfregulering hoër standaarde stel.
Volgens die handves sal mense wat self verklaar dat hulle maatskaplike toelaes ontvang nie op Sunbet kan dobbel nie. Die uitvoerende hoof, Ulrich Bengtsson, erken dat selfverklaring nie volmaak is nie omdat die groep nie toegang tot dié inligting het nie. Hy sê dit probeer ’n balans vind tussen data-integriteit en vryheid van keuse.
Dobbeladvertensies sal op sekere tye van die dag beperk word om veral kinders se blootstelling te verminder. Sun International sê hy sal nie adverteer waar minderjariges die teikengehoor is nie, hoewel regulering dit tans nie vereis nie. Sowat 10% van dobbeladvertensies sal aan veiliger en verantwoordelike dobbel gewy word.
Kunsmatige intelligensie sal vanaf 2027 help om spelers met moontlike probleemgedrag vroeër op te spoor. Bestaande merkers word tans nog met die hand deur agente opgevolg. By ’n ingryping volg ’n oproep, ’n afkoeltydperk, ’n depositolimiet of selfuitsluiting, na gelang van die erns.
Bengtsson sê sowat 83% van aanlyn spel vind binne lisensies plaas, terwyl 17% na buitelandse onwettige aanbieders lek. Dit beteken vyf uit elke ses weddenskappe bly binne die stelsel. Hy waarsku dat toekomstige regulering dié kanaalvorming nie moet verswak nie.