Aanlyn dobbel het tussen 2021 en 2025 met 390 persent gegroei en is nou byna vyf keer groter as vier jaar gelede. Navorsing van die Solidariteit Navorsingsinstituut toon dat Suid-Afrikaners in die 2024/25-boekjaar R1,5 triljoen aan weddenskappe geplaas het. Dobbeloperateurs het daarvan R75 miljard as bruto dobbelinkomste behou nadat wengeld uitbetaal is.
Die skaal blyk ook uit syfers van Statistieke Suid-Afrika. In 2023 het dobbel en weddenskappe R191 miljard beloop, of 34 persent van die persoonlike dienste bedryf. Dit was net minder as die R200 miljard van gesondheidsdienste en sowat drie keer meer as onderwysdienste.
Die instituut waarsku dat desperaatheid en aggressiewe bemarking die groei dryf. Baie mense glo hulle sal nie met gewone inkomste uitkom nie en waag geld op sport en aanlyn speletjies. Advertensies is oral by sportbyeenkomste sigbaar en stel dobbel voor as normale roete tot sukses.
Regsrisiko groei omdat sportweddenskappe wel wettig en streng gereguleer is, maar aanlyn casinospeletjies en slotmasjien speletjies op selfone onwettig bly. Dié speletjies word dikwels uit die buiteland bedryf en is juis so ontwerp dat dit sterk verslawend is. Oproepe na die dobbelhulplyn het oor die afgelope paar jaar met byna 700 persent gestyg.
Volgens die verslag dobbel 46 persent van volwassenes gereeld, meer as die deel wat voltyds werk. Sowat een uit drie dobbelaars voldoen aan internasionale maatstawwe vir probleemdobbel, teenoor 6 persent drie jaar gelede. Een finansiële diensverskaffer het bevind dat 71 persent van Sassa uitbetalings in sy ontleding na dobbel gaan, al is dit nie landwyd bevestig nie.