Oman in die Midde-Ooste digitaliseer sy openbare dienste as deel van Vision 2040. Die plan strek veel verder as om staatsdienste aanlyn te plaas. Dit mik daarna om die ekonomie weg van olieafhanklikheid te skuif na logistiek, belegging en nuwe besigheid.
Pieter Geldenhuys, direkteur by die instituut vir tegnologie, strategie en innovasie, het aan ministeriële werkswinkels in die land deelgeneem. Hy sê die regering het sterk visie om die land aantreklik te maak vir buitelandse belegging en nuwe inwoners. Oman beklee nou die negende plek onder lande wat buitelandse belegging lok.
Kern van die stelsel is die sogenaamde een keer beginsel. Wanneer ’n burger persoonlike inligting een keer aan ’n staatsdepartement gee, vra geen ander departement weer daarvoor nie. Almal gebruik dieselfde databasis.
Die vertroue berus op twee skakels. Eers word identiteit vasgelê met vingerafdrukke en gesigherkenning. Daarna word ’n SIM-kaart direk aan die persoon se foon gekoppel, sodat digitale kontrakte op die foon of rekenaar geteken kan word sonder ’n besoek aan ’n munisipale gebou.
Selfdiens-masjiene wys hoe ver die stelsel ontwikkel het. Met ’n vingerafdruk en ’n foto kan ’n masjien ’n debietkaart fisies druk. ’n Ander masjien verskaf ’n e-SIM of gewone SIM en druk selfs ’n bestuurslisensie en voertuigregistrasie.
Oman het nie bestaande prosesse gedigitaliseer nie, maar van voor af begin. Honderde verskillende stelsels is in een platform saamgevoeg met die burger as middelpunt, nie die departement of die proses nie. Huisplanne, besigheidsregistrasie, sertifikate en handtekeninge word digitaal afgehandel sonder papiergebaseerde polisieklarings.