JSE hou asem op terwyl olieprys styg

Die JSE het Donderdag wisselvallig verhandel en swakker geopen voordat kopers laatmiddag teruggekeer het. Die indeks van alle aandele het onveranderd op 107 109 punte gesluit. Die verloop toon versigtigheid te midde van stygende oliepryse en swakker buitelandse markte.

In die Verenigde State het die Dow Jones met 0,6% gedaal, die S&P 500 met 0,4% en die Nasdaq met 0,9%. In Europa het die FTSE 100 met 0,1% gestyg. Die Duitse DAX het met 1% teruggesak en die CAC 40 met 0,5%.

Op die JSE het die subindekse gemeng gesluit. Die nywerheidsindeks was 0,1% laer en die finansiële indeks 0,9% swakker. Die hulpbronindeks het 1% gewen en die dag se verliese help beperk.

Sasol was die grootste wenner met ’n styging van 5,5%. MTN het 3,5% bygevoeg, terwyl AngloGold en Gold Fields elk 2,5% sterker gesluit het. BAT, Boxer en Exxaro het elk 2,1% gewen. Clicks het 5,5% verloor en Altron 4%, terwyl Richemont, Shoprite en Hammerson elk 2,5% teruggesak het.

Op die valutamark verhandel die rand teen R16,60 teen die Amerikaanse dollar en R18,63 teen die euro. Teen die Australiese dollar staan hy op R11,58 en teen die Britse pond op R22,02. Die tienjaareffek lewer 9,1%.

Op die kommoditeitsmark kos goud 4 112 dollar per fynons, platinum 1 630 dollar en palladium 1 120 dollar. Brentolie staan op 106 dollar per vat na ’n styging van sowat 5%. Bitcoin kos 81 230 dollar of 1 357 000 rand. Die styging in olie hou druk op die brandstofprys en op lewenskoste.