Glencore steur hom nie aan vrese dat sy steenkoolportefeulje Australiese pensioenfondse sal afskrik voor sy notering in Sydney volgende Woensdag nie. Die myn- en handelsreus hoop dat beleggers in Australië deur depositobewyse aandele wat in Londen en Suid-Afrika genoteer is, sal kan koop en dat dit sy aandeelprys sal stut.
Die groep mik op die kort termyn vir insluiting in die ASX100-indeks. Pensioenfondse, wat sowat A$4,8 biljoen of 3,3 biljoen dollar bestuur, sal sentraal tot daardie plan wees. Uitvoerende hoof Gary Nagle sê dié fondse het aangedui dat hulle hul aandeelhouding kan vergroot indien Glencore in Sydney noteer.
Baie superannuasiefondse het mandate ingestel wat beleggings in maatskappye met steenkool beperk nadat kliënte druk uitgeoefen het. Glencore se belangrikste nywerheidsafdeling het verlede jaar sowat 25% van sy inkomste uit dié brandstof gekry, hoewel die aandeel van kragstasiesteenkool teenoor ’n jaar vroeër meer as gehalveer het.
Nagle sê op ’n mediagesprek Vrydag daar is nie meer dieselfde bedenkinge oor beleggings in fossielbrandstof as twee of drie jaar gelede nie. Hy skryf dit toe aan die wêreldwye energiekrisis ná die oorloë in Oekraïne en die Midde-Ooste, wat begrip gebring het dat steenkool deel van die energiemengsel bly. Kragstasiesteenkool vorm reeds ’n kleiner deel van die besigheid, terwyl staalmaaksteenkool noodsaaklik vir die mark bly, sê hy.
Hy sê Australiese beleggers ken mynbou goed en dit is nog ’n rede vir die Sydney-notering. AustralianSuper, die land se grootste fonds met meer as 300 miljard dollar onder bestuur, besit reeds ’n aansienlike belang in Glencore se Londense aandele, volgens Bloomberg Terminal.