Die Mededingingskommissie het by die Mededingingstribunaal aansoek gedoen om die voorwaardelike goedkeuring vir die samesmelting tussen Premier Groep en RFG Holdings in te trek. Die aansoek volg op ’n klagte van onder meer die Suid-Afrikaanse Klerasie en Tekstielwerkersunie oor ’n beweerde verbreking van die voorwaardes. Die kern van die geskil is Premier se beoogde sluiting van RFG se vrugteinmaakfabriek op Tulbagh in die Wes-Kaap.
Die samesmelting is op 6 Maart goedgekeur en op 30 Maart geïmplementeer. Voor die verwysing na die tribunaal het Premier glo geen planne genoem om vervaardigingsaanlegte of produksielyne of toerusting te sluit of van die hand te sit nie. Vier maande ná implementering het Premier die kommissie in kennis gestel dat hy die aanleg wil sluit omdat dit kommersieel onder druk verkeer.
Die fabriek, bekend as Fruit Processing Western Cape, is een van net twee vrugteinmaakaanlegte in Suid-Afrika en bied ’n belangrike roete na die mark vir sowat 200 vrugteboere in die Wes-Kaap. As ’n belangrike streekswerkgewer sal die beoogde sluiting meer as 400 permanente en vaste termyn werknemers raak, asook duisende seisoenwerkers in die breër landbouwaardeketting. Die unie meen dit stry met die werkbeskerming wat tydens die samesmelting onderneem is.
Kommissaris Doris Tshepe sê die ondersoek het bevind dat Premier en RFG nagelaat het om die beoogde sluiting voor goedkeuring aan die kommissie en die tribunaal te openbaar, alhoewel die partye die opsie voorheen bespreek het. Sy waarsku dat die weerhouding van wesenlike inligting die integriteit van mededingingsbeheer ondermyn en tot herroeping kan lei.
Volgens die kommissie was die sluiting wesenlik vir die beoordeling van mededinging en openbare belang, omdat dit die enigste mededinger tot Langeberg sou verwyder en ’n monopolie sou skep. Die tribunaal moet oor die herroepingsaansoek beslis. Premier se aandeelprys het Woensdag byna 4 persent laer verhandel, teen R170,24 om 11vm.